धादिङ,०४ माघ ।
नेपालमा पछिल्लो केही सातायता दैनिक कोरोनाबाट संक्रमित हुनेको संख्या बढेको छ। पछिल्लो २४ घण्टामा देशभर २२ हजार ८२८ को कोरोना परिक्षणमा १० हजार २५८ संक्रमित थपिएका छन्।
देशभरका प्रयोगशालाबाट १७ हजार ८७२ जनाको पीसीआर गर्दा ८ हजार ७३० र ४ हजार ९५६ जनाको एन्टिजेन परिक्षणमा १ हजार ५२८ गरी १० हजार २५८ जनामा सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ।
सोमबार ६ हजार ७३४ संक्रमित थपिएका थिए। यो सँगै देशभर संक्रमित हुनेको संख्या ९ लाख ७१ हजार ५९८ पुगेको छ ।यसैगरी पछिलो २४ घण्टामा ५६२ संक्रमित डिस्चार्ज भएसँगै संक्रमित भई निको हुनेको सङ्ख्या ८ लाख १७ हजार ५४७ पुगेको छ।सक्रिय संक्रमितको संख्या ३९ हजार ४४ पुगेको छ भने सङ्क्रमणमुक्त हुनेको दर ९४.२ प्रतिशत रहेको छ।
यस्तै पछिल्लो २४ घण्टामा संक्रमणका कारण १ जनाको मृत्यु भएसँगै हालसम्म सङ्क्रमणका कारण मृत्यु हुनेको संख्या एघार हजार ६२४ पुगेकोे मन्त्रालयको तथ्याङ्कमा उल्लेख गरिएको छ।
