काठमाडौं, ९ चैत
काठमाडौं महानगरपालिकाका प्रमुख विद्या सुन्दर शाक्यले काठमाडौं महानगरपालिकाले ल्याएको नीतिलाई क्रमिक रुपमा कार्यान्वयन गर्ने चरणमा अघि बढेको र त्यसमा सफलता प्राप्त भएको बताएका छन् । वडा–२२ को कार्यालय भवन उद्घाटन गर्ने सिलसिलामा उनले बुधबार यस्तो बताएका हुन् ।
‘हामी नीति, कार्यक्रम र बजेटको क्रमिक रुपमा कार्यान्वयन गर्ने चरणमा अघि बढेका छौं र त्यसमा हामी सफल पनि भएका छौँ,’ प्रमुख शाक्यले भने, ‘कहीकतै विवाद भएका ठाउँमा हामीले गर्न सकेनौँ । जहाँ अख्तियार र अदालतले रोक्ने काम भयो त्यहाँबाहेक सबै काम सम्पन्न गर्न सफल भयौँ ।’
प्रमुख शाक्यले २०७४ सालको स्थानीय तह निर्वाचनमा काठमाडौँ महानगरपालिकामा विजयी भएर आएपछिको पहिलो बैठकबाटै महानगरको केन्द्रीय भवन र सबै वडा कार्यालय भवन बनाउने घोषणा गरेको स्मरण गराउँदै ती घोषण सबै पूरा हुँदै गएको दावी गरे । ‘नगरसभाले त्यही नीतिअनुसार बजेट पनि व्यवस्थापन गरेको थियो,’ शाक्यले भने, ‘महानगरपालिकाको केन्द्रीय भवन र सबै वडा कार्यालय भवन हाम्रै कार्यकालमा बनाउँछौँ भनेर हामीले सपना देखेका थियौँ । लामो समयको प्रतिक्षापछि वडा नम्बर २२ को भवनको निर्माण सम्पन्न भई आज उद्घाटन भएको छ । म धेरै खुशी छु ।’
सम्पदा निर्माण–पुनर्निर्माणमा अवरोध होइन सहयोग गरौं
शाक्यले मेयरले जस लिन्छ भनेर रोक्ने प्रवृत्तिका कारण समस्या भएको गुनासो पनि गरे । ‘हामी सबैसँग सहकार्य गरेर सम्पदा निर्माण–पुनर्निर्माण र विकास निर्माणका काम गर्न चाहन्छौँ,’ उनले भने, ‘म गौरवका साथ भन्छु । मेरो कार्यकालयमा सबै नीतिगत निर्णय सर्वसम्मत रुपमा भएका छन् । तर, मेयरले जस लिन्छ भनेर रोक्ने प्रवृत्तिका कारण केही ठाउँमा समस्या भएको छ ।’ उनले राम्रो काममा प्रतिस्पर्धा गर्न आग्रह पनि गरे । ‘पेप्सी, फेण्टा, कोकोकोला व्यापारीहरूले अरुको बस्तु राम्रो भनेर कहिल्यै प्रचार गर्दैनन्,’ उनले भने, ‘हाम्रो पनि अवस्था त्यस्तै–त्यस्तै भएको छ । यो सम्पदा निर्माण–पुनर्निर्माण र विकास निर्माणको अभियान पेप्सी, फेण्टा, कोकोकोलाको व्यापार जस्तो होइन । त्यसैले राम्रा काममा अवरोध होइन सहयोग गरौँ ।’
उनले काममा अवरोध होइन सम्पदा निर्माण–पुनर्निर्माण र विकास निर्माणका कामका योजना लिएर आउन आग्रह गरे । ‘सम्पदा निर्माण–पुनर्निर्माण र विकास निर्माणमा कार्यपालिका र नगरसभाका सबै बैठकमा सर्वसम्तत निर्णय गरेर अघि बढेका छौँ,’ उनले भने, ‘यद्यपि, जीर्ण बनेको दमकल भवन पुनर्निर्माण गर्ने, लगंपार्क निर्माणलगायतमा अवरोध गरेकाले रोकिएका छन्।’
