काठमाडौं, १४ वैशाख ।
राज्यको ढुकुटीमा रहेको संचित रकम घट्दै गएपछि सरकारले बुधबारबाट लागु हुनेगरी १० वटा वस्तुको आयातमा रोक लगाएको छ ।
सरकारले रोक लगाएका वस्तुमा कुरकुरे, कुरमुरे, लेज र यस्तै उत्पादनहरु, सबै प्रकारका तयारी मदिरा, चुरोट तथा सुर्तीजन्य बस्तु (कच्चा पदार्थ ल्याउन छुट), हिरा (औद्योगिक कच्चा पदार्थ ल्याउन छुट), मोबाइल सेट, रंगीन टेलिभिजन (३२ इञ्चभन्दा माथिका), जिप, कार र भ्यानहरु, २५० सीसी भन्दा माथिल्लो क्षमताका मोटरसाइकल, सबै प्रकारका खेलौनाहरु र तास रहेका छन् ।
सरकारले रोक लगाएका वस्तुहरु चालु आर्थिक वर्ष २०७८/७९ को पहिलो नौ महिनामा विभिन्न देशबाट नेपालमा ५२ अर्ब ४४ करोड ९० लाख ७२ हजार रुपैयाँको भित्रिएको भन्सार विभागको तथ्याङ्कले देखाउँछ ।
पछिल्लो नौ महिनामा ५८ करोड ७६ लाख १५ हजार रुपैयाँको १२ लाख ९३ हजार ५६ केजी कुरकुरे, कुरमुरे, लेज र चिजबल्स नेपाल भित्रिएको थियो ।
२०७८ साउनदेखि चैत मसान्त सम्मको अवधिमा सबै प्रकारका तयारी मदिरा २ अर्ब ७० करोड २९ लाख ५० हजार रुपैयाँको नेपालले आयात गरेको छ । उक्त मूल्यमा ५१ लाख ७३ हजार ५४१ लिटर मदिरा नेपाल भित्रिएको विभागले जनाएको छ ।
यस्तै, बितेको नौ महिनामा ५५ करोड ४६ लाख ६२ हजार रुपैयाँको चुरोट तथा सुर्तीजन्य बस्तु नेपालले आयात गरेको थियो । सोही अवधिमा नेपालले २ अर्ब ४७ करोड २६ लाख ५७ हजार रुपैयाँको हिरा आयात गरेको विभागले जनाएको छ ।
चालु आर्थिक वर्षको पहिलो नौ महिनामा ३४ अर्ब ९७ करोड ९७ लाख ८९ हजार रुपैयाँको मोबाइल सेट नेपाल भित्रिएको देखिन्छ । उक्त अवधिमा नै ३ अर्ब ५० करोड २९ लाख ३८ हजार रुपैयाँको ८ लाख ४३ हजार ९३५ थान टेलिभिनज सेट नेपालले आयात गरेको थियो ।
नेपालले सोही समयमा विभिन्न देशबाट ५ अर्ब ५७ करोड २ लाख ८१ हजार रुपैयाँको जीप, कार र भ्यानहरु आयात गरेको विभागको तथ्याङ्कले देखाउँछ ।
बितेका नौ महिनामा १ अर्ब १६ करोड ४९ लाख २३ हजार रुपैयाँको २५० सीसी भन्दा माथि क्षमता भएका मोटरसाइकल नेपाल भित्रिएका छन् । सोही अवधिमा ७१ करोड ७७ लाख ४७ हजार रुपैयाँको विभिन्न प्रकारका खेलौनाहरु नेपालले आयात गरेको थियो । विभागका अनुसार पछिल्लो नौ महिना विभिन्न देशबाट नेपालमा १९ करोड ५५ लाख १० हजार रुपैयाँको खेल्ने तास भित्रिएको थियो ।
