धादिङ,१८ बैशाख ।
निर्वाचन आचारसंहिता बिपरित धादिङको नेत्रावती डबजोङ गाउँपालिकाको उपाध्यक्ष पदकी उम्मेदवार सीता गुरुङले भारतिय गाडी प्रयोग गर्नुभएको छ ।
नेपाली कांग्रेसको तर्फबाट गाउँपालिकाको उपाध्यक्षमा उम्मेदवारी दिनुभएकी गुरुङले यु.पी. ५६ भी ६७८६ नम्बरको भारतिय गाडी प्रयोग गरेको भेटिएको हो । उम्मेदवार गुरुङले निर्वाचन आचारसंहिता विपरित उत्तः गाडी प्रयोग गरेर धादिङवेशीं हुँदै पालिकाको चुनावी प्रचारमा जानुभएको हो ।
निर्वाचन आचारसंहितामा नेपालमा दर्ता भएका गाडीहरु निर्वाचन प्रयोजनको लागि एक प्रत्यक्ष उम्मेदवारले अधिकतम दुई ओटा हल्का सवारी साधन निर्वाचन अधिकृतको कार्यालयबाट स्वीकृत लिई सञ्चालन गर्न पाउने प्रावधान छ ।
निर्वाचन अधिकृतको अनुमति लिएर सवारी साधन नचल्ने स्थानमा बढिमा ४ ओटा घोडा प्रयोग गर्न पाइन्छ । निर्वाचन आचारसंहिता २०७८ अनुसार चुनावी प्रचार प्रसारका लागि उम्मेद्वारले बढिमा २ वटा मोटरसाइकल वा २ वटा गाडी मात्रै प्रयोग गर्न पाइन्छ ।
निर्वाचन आयोगले उम्मेदवारको तह अनुसार गाडी प्रयोग गर्न आचार संहितामै उल्लेख गरेको भएपनि कांग्रेसका उम्मेदवार गुरुङले भारतीय नम्बर प्लेटको गाडीमा कांग्रेसको चुनाव चिन्ह, झण्डा र आफ्नो फोटो सहितको प्रचार व्यानर प्रयोग गरेर हिड्नुभएको हो । कुनैपनि उम्मेदवारले विदेशी नम्बर प्लेटका गाडी प्रयोग गर्न नपाइने आचारसंहितामा प्रष्ट उल्लेख भएको धादिङका प्रमुख निर्वाचन अधिकृत रमेश प्रसाद ज्ञवालीले बताउनुभयो ।
स्थानिय तहको निर्वाचन आउन अब १२ दिन मात्रै बाँकी छ । दलहरुले चुनावी प्रचार प्रसार अन्तरगत घर दैलो अभियानमा लाई तिव्रता दिएको छ । चुनाव प्रचार प्रसारको क्रममा राजनितिक दलहरुले आचारसंहिता विपरित मोटरसाइकल र गाडी सहित पार्टीका झण्डा हल्लाउँदै पालैपालो बजार घुम्ने प्रवृत्ति देखिएको छ ।
