धादिङ,१९ जेठ।
स्थानीय सदस्यको निर्वाचन सम्पन्न भएपनि हाल स्थानीय तह कार्यपालिकाको निर्वाचन चलिरहेको छ ।
स्थानीय तहका सदस्यको निर्वाचनमा राजनीतिक दलहरुविचमा एक प्रकारको सहमतिका साथ गठबन्धन गरेर निर्वाचन गरिएको भएपनि हाल कार्यपालिकाको निर्वाचनको क्रममा भने विगतको तुलनामा फरक खालको परिणामहरु निस्किरहेका छन् । स्थानीय तहको निर्वाचनको परिणाम निकाल्न राजनितिक दलहरुले जुन प्रकारको गृहकार्य गरिरहेका थिए ।
सदस्य निर्वाचन पछि पूर्वावस्थाको जस्तो गृहकार्य गरिरहेको पाइएको छैन । केही स्थानीय तहमा कार्यपालिका सदस्यमा मतदानको क्रममा मत क्रम हुने सम्भावनाका कारण निर्वाचित सदस्यहरुलाई दलको निगरानीमा राखिएको भए पनि कार्यपालिका निर्वाचनको क्रममा मत क्रम भैरहेको पाइएको छ । यसले सबैजसो राजनीतिक दलहरुले आफ्नो माउ पार्टीको निर्णय समेत नमान्ने अवस्था सृजना भएको अनुमान गर्न सकिन्छ । अराजकताले दलहरुमा अहित गर्ने कुरामा कसैसँग विमती छैन ।
अहिलेसम्मको स्थितिलाई हेर्ने हो भने धेरैजसो स्थानीय निकायका सदस्यहरुले आ–आफ्नै शैलीमा आफ्नै आवश्यकताको आधारमा तालमेल गरेर निर्वाचनमा सहभागी भएको पाइएको छ ।
अहिले कार्यपालिकाको निर्वाचनमा धेरैजसो निर्वाचित सदस्यहरुले दलको कुरा नसुनेर आफ्नै तरिकाले चल्नुले दलहरु प्रति आफ्नै सदस्यहरुको समेत विमति रहेको वा दलको निर्णय आफ्नै कार्यकर्ताहरु सम्मले पनि नमानेको बुझ्न सकिन्छ । जुन पछिल्लो समय स्थानीय तहको कार्यपालिकाको निर्वाचन प्रक्रिया पछिको मत परिणामले देखाउँदैछ ।
अहिले राजनीतिक दलहरुप्रति एक आपसमै एकले अर्कालाई अविश्वास गर्ने प्रचलन बढेको छ । केही नेता कार्यकर्ताप्रति शंका लागे सामाजिक सञ्जालहरुबाट छरपष्ट पारिदिने र एकले अर्कालाई खुइल्याउने काम गर्ने, एकले अर्कालाई तुच्छ शैलीको भाषाहरु प्रयोग गरेर खुइल्याउने र आफुमात्र अव्वल वा पार्टीप्रति इमान्दार देखाउन अनेक खालका हर्कतहरु गर्ने गरेका कारण पनि एउटै पार्टी कमिटीबाट निर्वाचित भएकाहरुमै एक अर्कामा अविश्वास पैदा हुने र अन्ततः निर्णायक ठाउँहरुमा हुने मतदानमा एक अर्काविचमा मत क्रस गर्ने खालको प्रवृत्ति बढेको छ ।
यो सिंगो राजनीतिक दलहरुलाई चुनौतीको विषय हो । दलको तर्फबाट निर्वाचित भएकाहरुको बहुमत हुँदा हुँदै भोटिङको क्रममा मत क्रस हुने र अल्पमतमा रहेको राजनीतिक दलका नेता कार्यकर्ताले धेरै मत ल्याउने जस्तो जुन खालको गतिविधिहरु देखिएको छ यसको आन्तरिक व्यवस्थापनमा दलहरुले ध्यान दिन सक्लान् ? कि यो प्रवृत्ति बढेर जाने स्थिति छ ? यसमा दलका शिर्षस्थ नेतृत्वबाटै ध्यान दिन जरुरी छ नत्र, आगामी निर्वाचनमा दलका नेता कार्यकर्ताहरुले कहाँ मत देलान् अनुमान गर्न गाह्रो हुन्छ ।
अहिले राजनीतिक दलहरुले मेरो पार्टीमा सदस्यता यति छ यति भोट आउँछ भनेर जसरी भाषण गरिरहेका छन् यसको पनि अन्त्य हुने धेरै दिन नलाग्न सक्छ। यसर्थ सकेसम्म आफ्नो दलमा आवद्धता संख्या कति छ दलकै निर्णयानुसार चल्न मत जाहेर गर्न र नीति सिद्धान्त र अदर्श तथा दर्शनलाई आत्मसाथ गर्न सक्ने गरी दिशा निर्देश गर्न जरुरी छ ।
अहिलेकै स्थिति रहिरहे दलहरुमै भद्रगोलता निम्तन सक्छ,यसले विस्तारै दलभित्र रहेको प्रतिबद्ध कार्यकर्तासम्म रोगकै रुपमा विकास हुन सक्छ यो अबस्था दलहरुले विघटनसम्मको बाटोसम्म अंगाल्नुपर्ने स्थिति पनि आउन सक्छ ।
