काठमाडौँ,१९ असार ।
नेकपा माओवादी केन्द्रका प्रदेश इन्चार्ज तथा अध्यक्षहरुले पदाधिकारी टुंगो लगाउन र स्थानीय चुनावमा अन्तर्घात गर्नेलाई कारबाही गर्न जोडतोडले आवाज उठेको छ । कमलादीस्थित प्रज्ञा भवनमा आजदेखि सुरु भएको केन्द्रीय समितिको बैठकमा नेताहरुले यस्तो रिपोर्टिङ गरेका हुन् ।
बैठकमा बागमती प्रदेश कमिटीका अध्यक्ष सरल सहयात्रीले तत्काल पदाधिकारी चयनका साथै स्थायी कमिटी, पोलिटब्युरो लगायत गठन गरिनुपर्नेमा जोड दिए । ‘यो केन्द्रीय समिति बैठकबाट पदाधिकारी र अरु संरचना टुंग्याउनु पर्छ । बरु पाँच दिनसम्म बैठक बसौं । यो भद्रगोल अवस्था नराखौं ।’ उनले भने । साथै उनले माओवादी पार्टी भावुक भएको टिप्पणी गर्दै योग्यता नभएका नेताहरु पनि केन्द्रीय समिति सदस्य बन्ने अवस्था आएको बताए ।
त्यस्तै, बैठकमा बोल्दै मधेस प्रदेश नेता गणेश शाहले नेताहरुबीचको विवादका कारण गएको स्थानीय चुनावमा अन्तर्घात भएको र अन्तर्घातीलाई कारबाही गर्नुपर्ने बताए । उनले भने ‘पार्टीभित्र मनमुटाव तथा अन्तरसंघर्ष निकै बढ्यो जस्तो लाग्यो । चुनावको बेला हाम्रो मधेसमा अप्रत्याशित पराजय भयो ।’ उनले भने ‘यसबारे के गर्नुहुन्छ केन्द्रीय समितिले निर्णय गरोस् । अनुशासन समिति पनि गठन होस् । अनुशासन समितिको सिफारिसअनुसार कारबाही पनि होस् ।’
पार्टीले मधेसको आर्थिक, सामाजिक मुद्दाका विषयमा पनि छलफल गर्दै जनमत बटुल्नुपर्नेमा उनले जोड दिए ।
