धादिङ,१९ असार ।
चीनका लागि नवनियुक्त राजदूत विष्णुपुकार श्रेष्ठलाई धादिङबेसीमा सम्मान गरिएको छ । आईतबार धादिङबेसी स्थित जिल्ला समन्वय समितिको हलमा जिल्ला समन्वय समिति, नीलकण्ठ नगरपालिका र धादिङका नागरिक संस्थाहरूद्धारा आयोजित बधाई तथा शुभकामना कार्यक्रममा नवनियुक्त राजदूत श्रेष्ठलाई सम्मान गरिएको हो ।
कार्यक्रममा जिल्ला समन्वय प्रमुख नवराज अधिकारी, नीलकण्ठ नगरपालिकाका मेयर भिम प्रसाद ढुङ्गाना, प्रमुख जिल्ला अधिकारी कृष्णप्रसाद लम्साल र बिभिन्न संघसस्थाका प्रमुख एवम प्रतिनिधिहरुले संयुक्त रुपमा बधाई दिँदै सम्मान गरेका थिए ।सम्मान कार्यक्रमलाई सम्बोधन गर्दै राजदूत श्रेष्ठले नेपाल र चीनबीचको सम्बन्ध थप सुमधुर बन्ने बताउनुभएको छ।
उहाँले देश, सरकार, संविधानले तोकेको कानुनअनुसार कूटनीतिक सम्बन्ध र व्यवहार अघि बढाएर नेपाल र चीनबीचको सम्बन्धमा थप सुधार ल्याउने बताउनुभयो । उहाँले नाका खुलाउन,सामानहरू ल्याउन सहज गर्ने, अध्ययनका लागि चीन पुगेका विद्यार्थीको समस्या समाधान गर्ने लगाएतका विषयलाई लिएर चीनसँग सम्बन्ध विस्तारमा लाग्ने बताउनुभयो ।
उहाँले धादिङ तिब्बतसँग जोडिएको जिल्ला भएको स्मरण गर्दै देशको विकाससँगै यस धादिङको विकासमा पनि आफ्नो भूमिका रहने बताउनुभयो । उहाँले धादिङ आफ्नो गृहजिल्ला भएका कारण पनि प्राथमिकतामा पर्ने बताउनुभएको छ।
माओवादी केन्द्रका नेता श्रेष्ठलाई यही असार ९ गते नेपालको संविधानको धारा २८२ बमोजिम मन्त्री परिषद्को सिफारिसमा राष्ट्रपति विद्यादेवी भण्डारीले चीनका लागि नेपाली राजदूतमा नियुक्त गर्नुभएको हो ।
