काठमाडौं । निर्वाचन आयोगले आजदेखि अनलाइनबाट मतदाता नामावली दर्ता गर्न सकिने व्यवस्था गरेको छ । एक विज्ञप्ति जारी गर्दै आयोगले मतदाता नामावली संकलनको कार्यलाई सरलीकरण गर्न अनलाइनबाट नै फाराम भर्न सकिने व्यवस्था गरेको हो ।
बुधबारबाट परीक्षणकालीन रूपमा ‘वेबबेस्ट भोटर लिस्ट प्रि–रजिस्ट्रेसन सिस्टम’बाट काठमाडौं, भक्तपुर र ललितपुरमा सेवा सुरु गरेको आयोगका प्रवक्ता शालिग्राम शर्मा पौडेलले जानकारी दिए ।
फोटोसहितको मतदाता नामावलीमा हालसम्म नाम दर्ता नगरेका नेपाली नागरिकले अनलाइनबाट फाराम भर्न चाहेमा निर्वाचन आयोगको वेबसाइटमा गई व्यक्तिगत विवरण भरि जिल्ला निर्वाचन कार्यालयमा अनलाइनबाटै आवेदन पेश गर्न सक्नेछन् ।
मतदाता नामावली कसरी गर्ने दर्ता ?
- सुरुमा आयोगको वेबसाइट खोल्ने र ‘मतदाता नामावली प्रि–रजिष्ट्रेशन’मा क्लिक गर्ने,
- त्यसपछि ‘रजिस्टेशन’ मा क्लिक गर्ने,
- अब दर्ताको लागि सुरुमा मोबाइल नम्बर माग्नेछ । मोबाइल नम्बर राखी दायाँ साइडमा रहेको एरोमा क्लिक गर्ने,
- त्यो सँगै मोबाइल नम्बरमा भेरिफिकेसन लागि ‘ओटीपी’ कोड प्राप्त हुनेछ, उक्त ओटीपी कोड राखेसँगै दर्ताका लागि नयाँ वेबपेज खुल्नेछ,
- उक्त पेजको बाँया साइडमा ‘नयाँ दर्ता’ भन्ने विकल्प रहेको छ,
- नयाँ दर्तामा क्लिक गरेसँगै अब आफ्नो व्यक्तिगत विवरण भर्नुपर्ने हुन्छ, आवश्यक व्यक्तिगत विवरण भरेर अन्तिममा फर्म ‘समिट’ अर्थात बुझाउन सकिनेछ,
- त्यसरी फर्म समिट गरेसँगै त्यहाँ एउटा सङ्केत नम्बर प्राप्त हुनेछ, सङ्केत नम्बरयुक्त उक्त पेज तपाईंले प्रिन्ट गरेर सुरक्षित राख्न आवश्यक छ,
- सो पश्चात् अनलाईन फाराममा उल्लिखित संकेत नम्बरसहितको प्रिन्ट कपी र आवश्यक अन्य प्रमाण कागजात लिएर फोटो खिच्न र औँठाछाप दिन सम्बन्धित जिल्ला निर्वाचन कार्यालयमा सम्पर्क राख्नु पर्नेछ ।
