काठमाडौँ,०७ भाद्र ।
आज नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीलगायतका पार्टीले नेपाल बन्दको आह्वान गरेपछि काठमाडौं उपत्यकासहित देशका ठुला शहरहरुमा सामान्य प्रभाव देखिएको छ । यसैबीच सडक बन्द गराउन हिँडेका एक जना विप्लव समूहका कार्यकर्तालाई स्थानीयले कुटेको भिडियो सामाजिक सञ्जालमा भाइरल भैरहेको छ ।
सो घटना काभ्रेको बनेपामा भएको हो । भिडियोमा देखिए अनुसार ती युवकलाई स्थानीय र प्रहरीले नीलडाम बस्नेगरी कुटेको देखिन्छ । जिल्ला प्रहरी कार्यालय काभ्रेका प्रमुख चक्रराज जोशीका अनुसार ती कुटाई खाने युवक विप्लव समूहका काभ्रेका जिल्ला सदस्य प्रमोद गिरी हुन् ।
घटना कसरी भयो ?
सोमबार बिहान नेपाल बन्दको आह्वानसँगै विप्लव समूहका कार्यकर्ता सडकमा कुचो लगाउन जाऔं भन्दै बनेपाका स्कुल, कलेजबाट विद्यार्थीलाई लिएर सडकतर्फ लैजाँदै थिए । विप्लव समूहका कार्यकर्ताले हुलदंगा मच्चाउने आशंकापछि स्थानीयले प्रहरीलाई खबर गरेका थिए । प्रहरी आएपछि विद्यार्थीसहित कार्यकर्ताहरुको भागाभाग भएको थियो ।
भाग्ने क्रममा गिरीले सडकमा रोकिएको बसमा ढुंगा प्रहार गरेर सिसा फुटाईदिएपछि बसका चालक–सहचालकले उनलाई लखेटेर नियन्त्रणमा लिए । चालक–सहचालकले गिरीमाथि कुटपिट गर्न थालेपछि स्थानीयले पनि घेरा हालेर पिटेको प्रहरी प्रमुख जोशीले बताए ।
गिरीलाई नियन्त्रणमा लिनेक्रममा प्रहरीले पनि उनीमाथि कुटपिट गरेको थियो । गिरीसहित अन्य ८ जना पनि पक्राउ परेका छन् । पक्राउ पर्नेमा कालिकोट घर भएका १९ वर्षीय मनिष विक, कालिकोटको नरहरिनाथ गाउँपालिका घर भएका १९ वर्षीया वसन्ती बिक र कालिकोटको राजकोटा गापा–९ घर भएका २७ वर्षीय जयराज लोरलगायत छन् । उनीहरुमाथि मुद्दा चलाउने तयारी भइरहेको जोशीले बताए ।
