धादिङ,१५ असोज ।
आज अक्टोबर १ अर्थात्,३२ औँ अन्तर्राष्ट्रिय ज्येष्ठ नागरिक दिवस । दिवसको अवसरमा नीलकण्ठ नगरपालिका ज्येष्ठ नागरिक संघको आयोजना तथा नगरपालिकाको सहयोगमा जेष्ठ नागरिक बोझ होइन,समाजका अगुवा हुन् भन्ने नाराका साथ विभिन्न कार्यक्रम गरी मनाईएको छ । संघले नगरपालिका भित्रका ज्येष्ठ नागरिकहरुलाई सम्मान गरेको छ।
कार्यक्रमलाई सम्बोधन गर्दै नगरपालिकाका उपमेयर दिपक विश्वकर्माले ज्येष्ठ नागरिकबाट युवाहरुले सल्लाह, सुझाब र मार्गनिर्देशन लिनुपर्ने बताउनुभयो । उहाँले ज्येष्ठ नागरिकहरुको सेवासुविधाका लागि सक्दो सहयोग गर्ने प्रतिबद्धता व्यक्त गर्नुभएको छ।
जेष्ठ नागरिक संघ नीलकण्ठ नगरपालिकाका अध्यक्ष अब्जनाथ सापकोटाको अध्यक्षतामा भएको कार्यक्रममा उपमेयर विश्वकर्माको प्रमुख आतिथ्यता रहेको थियो । कार्यक्रममा बिभिन्न संघसस्थाका प्रमुख एवम प्रतिनिधी, बिभिन्न राजनितिक दलका प्रतिनिधी,ज्येष्ठ नागरिक,पत्रकार, नागरिक समाजका अगुवा लगायतको सहभागिता रहेको थियो ।
यस वर्ष ‘परिवर्तनशील विश्वमा ज्येष्ठ नागरिकप्रति लचिलोपन’ भन्ने अन्तर्राष्ट्रिय नारा र ‘ज्येष्ठ नागरिकको उत्थानशीलता : बदलिँदो विश्वको लागि अपरिहार्यता’ भन्ने राष्ट्रिय नाराका साथ देशैभर विभिन्न कार्यक्रम गरी यो दिवस मनाइएको छ । सन् १९९१ देखि हरेक वर्ष अक्टोबर १ तारिखलाई ज्येष्ठ नागरिक सम्मान र अधिकारमा पहुँच पु¥याउने उद्देश्यका साथ संयुक्त राष्ट्र सङ्घको आह्वानमा विश्वभर यो दिवस मनाउने गरिन्छ ।नेपालमा पनि गएको डेढ दशकदेखि यो दिवस मनाउन थालिएको हो ।
नेपालमा ज्येष्ठ नागरिकको सङ्ख्या झण्डै ३० लाखको हाराहारीमा छ । सरकारको तर्फबाट २०५१ सालमा मासिक एक सय रुपैयाँबाट सुरु गरिएको ज्येष्ठ नागरिक भत्ता अहिले चार हजार रुपैयाँ पुर्याइएको छ । यस्तै ज्येष्ठ नागरिक परिचयपत्र वितरण गरी सार्वजनिक गाडीमा ज्येष्ठ नागरिकका लागि सिट आरक्षण तथा ५० प्रतिशत भाडा छुट दिने व्यवस्था गरिएको छ ।
यस्तै सार्वजनिक ठाउँमा सेवा लिँदा लाइन बस्नु नपर्ने र सरकारी अस्पतालमा ज्येष्ठ नागरिकको उपचार गर्दा औषधिउपचारमा सहुलियत दिने व्यवस्था पनि छ । तर ज्येष्ठ नागरिकले कतिपय सेवा सुविधा नपाएको गुनासो गर्दै आएका छन् ।
