झापा, २७ मंसिर
निर्माण कम्पनीले सडक निर्माणमा ढिलाई गरेको भन्दै कनकाई नगरपालिका र झापा गाउँपालिका जोड्ने अमरपथ मार्ग स्थानीयले अवरुद्ध गरेका छन् । सडक निर्माणमा ढिलाइ हुँदा अत्याधिक धुलो उडेको भन्दै झापा-६ स्थित शरणामतीका स्थानीयले सडक अवरुद्ध गरेर विरोध जनाएका हुन् । यो सडक प्रदेश सरकारको बजेटमा निर्माण भइरहेको छ । पूर्वाधार विकास कार्यालय झापाले ५७ करोड रुपैयाँमा चुवी-रोषन-मैनाचुली जेभीलाई ठेक्का दिएको थियो ।
२०७६ भदौमा चार वर्षमा काम सक्ने गरी यो सडक निर्माणको ठेक्का लागेको थियो । उक्त निर्माण कम्पनीले अर्कै निर्माण व्यवसायीलाई पेटी ठेक्का दिएपछि निर्माणमा ढिलाइ भएको स्थानीयको बुझाइ छ । सडकको उत्तरी भाग अर्थात् कनकाई नगरपालिकातर्फ धामधम काम भएको तर झापातर्फ कामै नभएको भन्दै स्थानीयले विरोध स्वरूप सडक बन्द गर्नुपरेको स्थानीय लोकबहादुर कार्कीले बताए ।
‘हामीले सबै दिन धुलो खानुपर्ने ? हामीलाई किन ढाँट्नु,’ उनले भने, ‘काम गरेनन् । त्यही भएर हामीले सडक अवरुद्ध गरेका हौँ ।’ स्थानीयले वडाकार्यालयमा निवेदन दिँदा पनि बेवास्ता गरेका कारण सडक अवरुद्ध गर्नुपरेको उनी बताउँछन् । स्थानीयले सडकमा ढाट लगाएर सडक अवरुद्ध गरेका छन् । जसका कारण झापा गाउँपालिका जाने ठूला सवारी बाटोमा लामवद्ध भएका छन् ।
आइतबारबाट गरिएको यो आन्दोलनले राष्ट्रिय राजमार्ग हुलाकी राजमार्गको निर्माण कार्यमा समेत असर परेको छ । स्थानीयको अवरोधका कारण हुलाकी राजमार्ग निर्माणको सामग्री लिएर गएका ट्रिपर पनि बाटोमा रोकिएका छन् । स्थानीयले निर्माण सामग्री ढुवानीको हकमा सोमबार दिनभरको अवस्था हेर्ने र वार्ता भएर सकारात्मक भएमा मात्र सवारी चल्न दिने बताएका छन् । स्थानीयको पहलमा सोमबार वडाध्यक्षसहित बसेको छलफलले वडाध्यक्षलाई वार्ताको पहल गर्न आग्रह गरेका छन् ।
झापा गाउँपालिका-६ का वडाध्यक्ष हरिबहादुर बानियाँले जनताको जनताले गरेको आन्दोलनबारे सम्बन्धित निकायमा जानकारी गराएको बताए । तर, सम्बिन्धत निकायबाट माग सम्बोधनमा ध्यान नदिइएको उनले बताए । स्थानीयले केही दिनअघि दिएको ज्ञापनपत्र सबै ठाउँमा पठाउँदा पनि बेवास्ता गरेका कारण यो अवस्था आएको उनको भनाइ छ ।
