धादिङ,२५ बैशाख ।
धादिङको ज्वालामुखी गाउँपालिकामा तरकारी खेती सम्बन्धी सिप विकास तालिम सम्पन्न भएको छ । नवप्रर्वतन साझेदारी कोष ज्वालामूखी कृषि प्रवद्र्धन परियोजना अन्तरगत तरकारी खेती गर्ने कृषक समुह र कृषि फर्महरुको लागि बैशाख १८ गतेदेखि सुरु भएको तालिम शनिबार सम्पन्न भएको हो ।
गाउँपालिकाका कृषकहरुलाई व्यवसायिक बनाइ कृषि उत्पादनमा वृद्धि गराउन र परम्परागत खेतीलाई आधुनिक खेतीमा रुपान्तरण गर्ने उद्धेश्यले तालिम संचालन गरिएको कृषि विकास शाखा प्रमुख नविन बुढाथोकीले बताउनुभयो ।
मौसमी तथा बेमौसमी खेति पद्धति, बेमौसमी तरकारी खेती कसरी गर्ने, नर्सरी कसरी स्थापना गर्ने रु विउ उत्पादन, प्लाष्टीक घरमा तरकारी खेती संचालन गर्ने तरिका, रोग किरा पहिचान तथा व्यवस्थापन लगाएत किसानलाई चाहिने सिप ज्ञानको विषयमा तालिम दिइएको कृषि विकास शाखा प्रमुख बुढाथोकीले बताउनुभयो ।
तालिम समापन कार्यक्रममा बोल्नु हुँदै गाउँपालिकाका उपाध्यक्ष धर्म बहादुर अर्यालले यस प्रकारका तालिमले कृषकहरुको सिप र क्षमता विकासका लागि महत्वपूर्ण भूमिका खेल्ने बताउनुभयो । तालिममा सिकेका सिप र ज्ञानलाई व्यवहारमा उतारेर तरकारी खेतीलाई व्यवसायिक उत्पादनमा जोड दिन सहभागिहरुलाई आग्रह गर्नुभएको छ ।
गाउँपालिकाको ७ वटै वडाका ७५ जना कृषकहरुको को सहभागिता रहेको तालिममा राष्ट्रिय बागवानी अनुसन्धान केन्द्रका प्राविधिक अधिकृत सुजन सुवेदीले प्रशिक्षण दिनुभएको थियो ।
गाउँपालिकाका उपाध्यक्ष धर्म बहादुर अर्यालको अध्यक्षतामा सम्पन्न भएको तालिममा लेखा अधिकृत विदुर शर्मा नेपालको प्रमुख आतिथ्यता रहेको थियो । कार्यक्रममा आइ टि अफिसर केदार इटनी, कृषि प्राविधिक विष्णु श्रेष्ठ, विमल शाक्य लगायतको उपस्थिति रहेको थियो ।
