धादिङ,०८ साउन ।
धादिङका थप ३८ जनामा डेँगु संक्रमण पुष्टि भएको छ । आज नीलकण्ठ नगरपालिकाका ३६ जना, सिद्धलेक गाउँपालिका र ज्वालामुखी गाउँपालिकाका १÷१ जना गरी ३८ जनामा डेँगु संक्रमण पुष्टि भएको हो । संक्रमिमध्ये २२ जना पुरुष र १६ जना महिला रहेको स्वास्थ्य कार्यालय धादिङले जनाएको छ।
साउन १ गते देखि जिल्लामा संक्रमित हुनेको संख्या १९७ पुगेको छ। जसमा १०८ जना पुरुष र ८९ जना महिला रहेका छन्। कुल संक्रमितमध्ये १८६ जना नीलकण्ठ नगरपालिकाका मात्रै रहेका छन् ।
त्यसैगरी जिल्लाको ज्वालामुखी गाउँपालिकामा ३ जना, गल्छी गाउँपालिका, सिद्धलेक गाउँपालिकामा २÷२ जना, बेनीघाट रोराङ, त्रिपुरासुन्दरी, गंगाजमुना र रुवी भ्याली गाउँपालिकामा १÷१ जना संक्रमित भएकास छन् ।
साउन महिनासँगै भदौ र असोजमा डेङ्गीको सङ्क्रमण अझै बढ्न सक्ने अनुमान छ । डेङगु लामखुट्टेबाट सर्ने रोग हो । पानी जम्ने सफा ठाउँमा एडिज एजिप्टी र एडिस एल्बोपिक्टस प्रजातिको लामखुट्टेले फुल पार्छ । ती फुलबाट लार्भा निस्कन्छ र त्यही लार्भा वयस्क भएर टोकेपछि डेङ्गी लाग्छ ।
लामखुट्टेको टोकाइबाट जोगिनको लागि झुल टाँगेर सुत्न, खेतबारीमा काम गर्दा लामो बाहुला भएको लुगा लगाउन, घरको झ्यालढोकामा जाली हाल्न, लामखुट्टे भगाउने धुप वा मलमको प्रयोग गर्न, घरपालुवा पशुपक्षी व्यवस्थित ढङ्गले पाल्न र घर वरिपरि गमला, टायर वा कुनै पनि खुला भाँडामा पानी जम्न नदिन आग्रह गरेको छ ।
