एजेन्सी
म्यानचेस्टर युनाइटेड इंग्लिस प्रिमियर लिगमा अंक तालिकाको पुछारमा रहेको बर्नलीसँग १-१ गोलको बराबरीमा रोकिएको छ। युनाइटेडको बराबरीको फाइदा भने वेस्टह्याम युनाइटेडले लिएको छ। वेस्टह्यमले वार्टफोर्डलाई १-० ले पराजति गर्दै चौंथो स्थानमा उक्लियो। बराबरीले युनाइटेड भने पाँचौ स्थानमा झर्न पुग्यो।
रेलिगेशन जोनमा संघर्षरत बर्नलीलाई भने जे रोड्रिगेजले महत्त्वपूर्ण एक अंक दिलाएका थिए। खेलमा अग्रता भने म्यानचेस्टर युनाइटेडले लिएको थियो। पाउल पोग्बाले सिजनको पहिलो गोलमा युनाइटेडले १८ औं मिनेटमा अग्रता लियो।
तर‚ दोस्रो हाफको सुरुवातमै बर्नलीले बराबरी गोल फर्कायो। रोड्रिगेजले वेगजर्स्टको पासलाई सदुपयोग गर्दै ४७ औं मिनेटमा खेल बराबरीमा ल्याए।त्यसपछि दुवैतर्फबाट थप गोल हुन सकेन।
मंगलबार राति नै भएको अर्को खेलमा वेस्ट ह्यामले वार्टफोर्डलाई १-० ले पराजित गर्दै महत्त्वपूर्ण तीन अंक हासिल गर्यो। वेस्टह्यामको जितमा जरोड बोउनले गरेको एकमात्र गोल निर्णायक बन्यो।
पहिलो हाफमा गोलरहित बराबरी सकिएको खेलमा वेस्टह्यामले ६८ औं मिनेटमा बोउनको गोलमार्फत अग्रता लिएको थियो। उक्त अग्रतालाई कायम राख्दा वेस्टह्यामले शीर्ष चारमा उक्लिन सफल भयो।
मंगलबार नै भएको अर्को खेलमा फ्र्न्याक लाम्पार्डको एभर्टन पनि न्युक्यासल युनाइटेडसँग ३-१ ले पराजित हुन पुग्यो।
जितपछि वेस्टह्यामको २४ खेलमा ४० अंक भएको छ। युनाइटेड ३९ अंकका साथ पाँचौ स्थानमा रहँदा लिगमा म्यानचेस्टर सिटी ५७ अंकका साथ शीर्ष स्थानमा छ। त्यस्तै‚ लिभरपुल ४८ अंकका साथ दोस्रो र चेल्सी ४७ अंकका साथ तेस्रो स्थानमा रहेका छन्।
