काठमाडौं, १५ चैत
मानव अधिकार तथा शान्ति समाजले रुसलाई तत्काल युद्ध रोक्न आग्रह गर्दै काठमाण्डौस्थित रुसी दुतावास अगाडि प्रदर्शन गरेको छ ।
मंगलबार गरिएको प्रदर्शनमा रुसलाई तत्काल युक्रेनबाट सैनिक फिर्ता गरि युद्ध रोक्न आह्वान गरिएको थियो ।
रुसी आक्रमणका कारण बालबालिका र महिलासहित हजारौ निहत्था मानिसको हत्या भएको समाजद्वारा मंगलबार जारी विज्ञप्तिमा उल्लेख छ।
रुसले युक्रेनका शैक्षिक प्रतिष्ठानहरुमाथि गरेको आक्रमण मानवता विरुद्धको अपराध भएको पनि समाजले जनाएको छ ।
रुसी आक्रमणका कारण ३६ लाख बढी युक्रेनीहरु शरणार्थी भएको, ६५ लाख बढी आन्तरिक रुपमा विस्थापित भएको र युद्धकै कारण मानवअधिकार उल्लंघनको डरलाग्दो सिलसिला शुरु भएको विज्ञप्तिमा उल्लेख छ ।
प्रदर्शनमा युद्ध लम्बिदै जाँदा परमाणु अस्त्र प्रयोग हुने त होइन? कतै विश्व युद्ध शुरु हुने त होइन ? मानव सभ्यता नै समाप्त हुने त होइन? भन्ने त्रासदीप्रति शान्तिवादीहरुले गम्भीर चिन्ता व्यक्त गरेका थिए ।
प्रदर्शन पश्चात रुसी राष्ट्रपति भ्लादीमिर पुटीनलाई युद्ध तत्काल रोक्न आग्रह गर्दै शान्ति समाजका तर्फबाट लेखिएको पत्र काठमाण्डौस्थित रुसी दुतावासका अधिकारीलाई हस्तान्तरण गरिएको थियो ।
प्रदर्शनमा समाजका संस्थापक सभापति कृष्ण पहाडी, सल्लाहकार होमकान्त चौलागाई, सल्लाहकार उत्तम पुडासैनी, संस्थापक सदस्य कृष्ण कँडेल, महासचिव रामकृष्ण बराल, पूर्व उपसभाति रेनुका पौडेल, सचिव रामप्रसाद जोशी, सचिव नम्रता खरेल लगायत सहभागी रहेका थिए ।
यसैगरी रुसलाई तत्काल युद्ध रोक्न आग्रहसहित शान्ति समाजद्वारा चैत १५ गते वुटवलमा आयोजित प्रदर्शनमा सभापति गोविन्द खनाल लगायत शान्तिवादीहरुको सहभागिता थियो ।
चैत १४ गते साँझ पाल्पा, बारा, रुपन्देही र झापामा, चैत १५ गते संखुवासभा, चितवन, दाङ, नवलपुर, तेह्रथुम, बाजुरा लगायत एक दर्जन बढी जिल्लामा समाजले प्रदर्शन गरेको छ ।
