धादिङ,०२ बैशाख।
काठमाडौँ महानगरपालिकाले नगरवासीलाई कुहिने र नकुहिने फोहोर छुट्टाछुट्टै वर्गीकरण गरेर राख्न आग्रह गरेको छ ।
फोहोर वर्गीकरण नगरी फोहर बोक्ने गाडीसम्म ल्याए पुनःघरमा नै फर्काईने र कारवाहीस्वरुप प्रतिव्यक्ति पाँचसय रुपैयाँ जरिवानासमेत गर्ने निर्णय गरेको महानगरले जनाएको छ ।
महानगरपालिका वातावरण विभाग प्रमुख सरिता राईले छुट्याइएको फोहर व्यवस्थापन गर्न सहज हुने र छुट्याइएको फोहर लिने गाडी पनि फरकफरक दिन आउने भएकाले सोहीअनुरुप व्यवस्थापन गर्न आग्रह गरिएको बताउनु भयो।
महानगरको आग्रहलाई बेवास्ता गरे प्राकृतिक स्रोत संरक्षण ऐन २०७७अनुसार कसुर मानी सजाय हुने बताइएको छ । पछिल्लो समय महानगरलगायत काठमाडौं उपत्यकाको १८ स्थानीय तहको फोहर व्यवस्थापन कार्य जटिल बन्दै आएको छ।
नुवाकोटको सिसडोल भरिनुका साथै उक्त स्थानसम्म जाने सडकमा स्थानीय बासिन्दाले समयसमयमा अवरोध गर्दा नियमित रुपमा फोहोर उठ्न सकेको छैन ।
