धादिङ,०३ बैशाख।
चन्द्रागिरि नगरपालिका–२ का स्थानीयको अबरोधका कारण पाँच दिनदेखि नागढुंगा–सिस्नेखोला सुरुङमार्ग निर्माण रोकिएको छ । सुरुङ खन्न थालेपछि पानीका मुहान सुकेको भन्दै गत चैत २८ गतेदेखी स्थानीयले निर्माणमा अवरोध गर्दै आएका छन्। यही वडाका स्थानीयले धादिङतर्फ पनि निर्माणको काम अघि बढ्न दिएका छैनन्।
स्थानीयले चैत २८ र २९ गते टुटिपाखामा रहेको निर्माण कम्पनी हाज्मा एन्डो र परामर्शदाताको कार्यालय तोडफोड गरेको आयोजनाले जनाएको छ । यसअघि स्थानीयले २०७७ फागुनमा आजीवन निःशुल्क खानेपानीको व्यवस्थापन गर्नुपर्नेलगायत ८ बुँदे माग आयोजनासमक्ष राखेका थिए । तर आफूहरूका माग पूरा नगरिएको वडा नम्बर २ वडा अध्यक्ष गोपी सुर्खेतीले बताउनुभयो । खानेपानीलगायतका माग राखेर निर्माण कम्पनीको कार्यालय पुग्दा प्रहरीले हस्तक्षेप गरेपछि झपड भएको उहाँको दाबी छ ।
वडाध्यक्ष सुर्खेतीकै नेतृत्वमा गएको टोलीले कार्यालय तोडफोड गरेको आयोजना स्रोतको दाबी छ । तर सुर्खेतीले भने आफूहरूले केही तोडफोड नगरेको बताउनुभयो । वार्तामा बसिरहेका बेला स्थानीयमाथि प्रहरी हस्तक्षेप हुँदा स्थानीय आक्रोशित बनेको उहाँको भनाइ छ ।
नागढुंगा–सिस्नेखोला सुरुङमार्ग आयोजनाका निर्देशक नरेशमान शाक्यले वार्ताबाट समस्या समाधानको प्रयास भइरहेको बताउनुभयो । तीव्र गतिमा निर्माणको काम भइरहेको समयमा अचानक अहिले आएर काम रोकिएको भन्दे शाक्यले वार्ता भइरहेकाले छिट्टै समस्या समाधान भएर निर्माणको काम अघि बढ्ने बताउनुभएको छ।
पानीको समस्या भएका ठाउँमा सुक्खायाममा आयोजनाले डेढ महिनासम्म ट्यांकरबाट पानी उपलब्ध गराउने शाक्यले बताउनुभयो।
पानी तान्ने पम्प परिवर्तन गर्ने र त्यसका लागि एउटै पम्पको डेढ÷दुई करोड रुपैयाँ पर्ने भन्दे शाक्उले यसका लागि अध्ययन गरेर काम गर्नुपर्ने बताउनुभयो।पम्प जडान हुने बेलासम्म सुक्खायाममा ट्यांकरबाट पानी उपलब्ध गराइने उहाँको भनाइ छ ।
अहिले प्रतिदिन ५ ट्यांकर पानी उपलब्ध गराइराखेको भन्दै उहाँले त्यसले नपुगे प्रतिदिन १० ट्यांकर पानी दिन तयार रहेको तर आफूहरूका माग पूरा भएनन् भनेर कार्यालय तोडफोड गर्नु गलत रहेको नागढुंगा–सिस्नेखोला सुरुङमार्ग आयोजनाका निर्देशक शाक्यको भनाई छ।
