धादिङ,०७ भाद्र।
नवौँ राष्ट्रिय खेलकुद प्रतियोगिताका लागि धादिङ जिल्ला खेलकुद विकास समितिले आजदेखि जिल्लास्तरीय खेलाडी छनोट गर्ने भएको छ । गण्डकी प्रदेशको पोखरामा हुने प्रतियोगिताको लागि आजदेखि खेलाडी छनोट गरिने धादिङ जिल्ला खेलकुद विकास समितिका अध्यक्ष प्रताप सिं तामाङले जानकारी दिनुभयो ।
तामाङका अनुसार आज भदौ ७ गते कबड्डी, फुल कन्ट्याक्ट कराते र ब्याडमिन्टन, भदौ ८ गते टेवलटेनिस र भदौ ९ गते बुद्धिचाल र आई टि एफ तेक्वान्दो खेल सञ्चालन गरिनेछ । सबै खेल धादिङबेशी स्थित जिल्ला खेलकुद विकास समितिको कर्बडहलमा सञ्चालन गरिने तामाङले बताउनुभयो । जि.खे.वि.स.ले खेल सञ्चालन हुने कार्यतालिका र प्रत्येक खेलका लागि सम्पर्क व्यत्ति सार्वजनिक गरिएको छ ।
करिब चार दशकपछि गण्डकी प्रदेशले राष्ट्रिय खेलकुद प्रतियोगिताको आयोजना गर्ने अवसर प्राप्त गरेको छ । विसं २०४० मा दोस्रो संस्करणको आयोजनापछि पोखरालाई नवौँ संस्करण आयोजनाको मौका मिलेको हो । राष्ट्रिय खेलकुदमा दुई प्रदर्शनसहित ३८ खेल सञ्चालन हुनेछन् । अधिकांश खेल पोखरामा र केही खेल पोखरा बाहिर गर्ने तयारी छ । प्रदेशका ११ वटै जिल्लामा कम्तीमा एक खेल सञ्चालन गर्ने योजना बनाइएको छ ।
