धादिङ क्रिक्रेट मिटमले चितवनमा जारी प्रथम बागमती प्रदेश स्तरीय खेलकुद प्रतियोगीतामा विजयी सुरुवात गरेको छ।आज चितवनको गौतमबुद्ध अन्तराष्ट्रिय रंगशालामा भएको खेलमा रसुवालाई ९ विकेटले पराजित गर्दै धादिङले विजयी सुरुवात गरेको हो।
टस जितेर पहिले ब्याटिङ गरेको रसुवा १४ दशमलव १ ओभरमा मात्र ५१ रनमा समेटिएको थियो । रसुवालाइ सस्तैमा समेट्न धादिङका श्याम त्रिपाठीले उत्कृष्ट बलिङ गरेका थिए । उनले ४ ओभर बलिङ गर्दै २ मेडन राखेर मात्र १९ रन खर्चदै ४ विकेट लिन सफल भए।
बलिङ तर्फ धादिङका उज्वल थापाले ३ विकेट लिएका थिए भने रुपेश भुजेलले १ विकेट लिएका थिए । रसुवा २ जना खेलाडी भने रन आउट भएका थिए ।
रसुवाका २ ब्याटरले मात्र दुइ अंकको रन जोड्न सफल भएका थिए । रसुवाका ओपनिङ ब्याटर सविन श्रेष्ठ र इनिङको अन्तिमतिर ब्याटिङ गर्न आएका प्रिन्स लामाले मात्रै १० रन जोड्न सफल भएका थिए । रसुवाका ५ ब्याटर शुन्य रनमा आउट भएका थिए ।
५२ रनको झिनो लक्ष्य लिएर मैदानमा उत्रिएको धादिङले ५ ओभरमात्रै खेलेर १ विकेट गुमाउदै रसुवामाथी सहज जित हात पारेको हो । धादिङको लागि ओपनिङ ब्याटर अमृत थापाले अविजित ३० रनको योगदान दिए भने अर्का ब्याटर आरम्भ तिमल्सेना ९ रनमा अविजित रहेका थिए । अमृतले १९ बल खेल्दै ६ चौका मद्धतमा ३० रन बटुलेका थिए ।
खेलको म्यान अफ द म्याच धादिङका श्याम त्रिपाठी घोषित भए । दोस्रो चरणमा प्रवेश गरेको धादिङले अव चैत ५ गते पहिलो चरणमा सिधै बाइ पाएर दोस्रो चरणमा प्रवेश गरेको काठमाण्डौ संग खेल्ने छ ।
