धादिङ,०३ जेठ ।
धादिङको चार वडामा स्वतन्त्र उम्मेदवार विजयी भएका छन् । नेपाली कांग्रेसले टिकट नदिएपछि स्वतन्त्रबाट चुनाव लडेका अहिले सम्म ४ जनाले चुनाव जिति सकेका छन् । स्वतन्त्रमध्ये सबैभन्दा धेरै मतान्तरले नीलकण्ठ नगरपालिका वडा नम्बर ८ मा प्रकाश श्रेष्ठले जितेका छन् ।
उनले नेपाली काँग्रेसका उम्मेदवार रमेश कोईरालालाई ७९० मतान्तरले पराजित गर्दै बिजयी भएका हुन् । जम्मा खसेको २ हजार २८८ मा श्रेष्ठले ११५३ मत ल्याउँदा काँग्रेसका कोईरालाले ३६३, एमालेका उम्मेदवारले ४०२ र माओवादीका उम्मेदवार बद्री प्रसाद सुवेदीले १०० मत पाएका छन् । नीलकण्ठ नगरपालिका वडा न ८ मा प्रकाश श्रेष्ठको प्यानल नै बिजयी भएका हुन् । वडा सदस्यहरुमा दुर्गा अधिकारी १११८,विमला बराइली ११४०,उमेश मगर १०८५,छविप्रसाद काप्री १०१८ मत प्राप्त गरेका छन् ।
यता नीलकण्ठ नगरपालिका वडा नम्बरमा ३ मा पनि स्वतन्त्र उम्मेदवारी दिएका राजकुमार श्रेष्ठ बिजयी भएका छन् । नेपाली काँग्रेसको पकट क्षेत्र मानिएको नीलकण्ठ ३ नम्बर वडामा गुलाफ चिन्ह लिएर स्वतन्त्र उम्मेदवारी दिनुभएको श्रेष्ठले कुल २ हजार ८४१ मत खसेकोमा श्रेष्ठले १ हजार ३ सय ३९ मत ल्याउन सफल भए । उनका निकटतम् प्रतिद्धन्दी नेपाली काँग्रेसका गोपी कृष्ण भण्डारी ले ६३९ मत ल्याउदा नेकपा एमालेका किरण पाठकले २४१ मत र नेकपा माओवादीका नारायण कुमार श्रेष्ठले ३९५ मत पाए । श्रेष्ठले काँग्रेसको आधिकारिक उम्मेद्वारलाइ ७१० मतको फराकिलो अन्तरले हराउदै विजयी बनेका हुन् ।
यसैगरी धादिङकै ज्वालामुखी गाउँपालिका वडा नं ४ मा पनि नेपाली काँग्रेसका बागी उम्मेद्वार कृष्ण गुरुङ विजयी भएका छन् । २०७४ मा काँग्रेसबाटै टिकट पाएर वडा अध्यक्ष जितेका गुरुङ यसपटक पार्टीलाइ अरुलाइनै टिकट दिएपछि असन्तुष्ट कार्यकर्ताहरुको समर्थनमा बागी उम्मेद्वारी दिएका थिए । खरायो चिन्ह लिएर प्रतिस्पर्धा गरेका गुरुङले ११ सय ३ मत पाउँदा काँग्रेसका कृष्णलाल श्रेष्ठले जम्मा ५ सय ३९ मत मात्रै पाए। नेपाली काँग्रेसको गढ भनेर चिनिने उक्त वडामा यसपटक काँग्रेसको आधिकारिक उम्मेद्वारलाइ एमाललेपनि उछिनेको छ ।
त्यस्तै धुनिवेशी नगरपालिका वडा नम्बर ५ को वडा अध्यक्षमा पनि स्वतन्त्रबाट विशाल भट्टराई वडा अध्यक्षमा विजयी भएका छन् । गठबन्धनको तर्फबाट नेकपा माओवादी केन्द्रका कृष्णकुमार रेग्मीलाई २०८ मतले पराजित गर्दै बिजयी भएका हुन् । भट्टराईले ८८६ मत ल्याए भने माओवादी केन्द्रका रेग्मीले ६७८, एमालेका उम्मेदवार बुद्धिराज घलेले १८१, राप्रपाका उम्मेदवार भोटे राईले १८ मत ल्याएका छन् ।
