धादिङ,२१ साउन ।
चिल्ड्रेन पार्क आवासिय माध्यमिक विद्यालयले एसईई परिक्षा २०७८ मा उत्तीर्ण विद्यार्थीहरुलाई बधाई तथा शुभकामना कार्यक्रम गरेको छ । शनिवार विद्यालयको सभाहलमा एक विशेष कार्यक्रमको आयोजना गरी एसईई परिक्षामा उत्तीर्ण भएका ५६ जना विद्यार्थी बधाई तथा सम्मान गरीएको हो ।
चिल्ड्रेन पार्क आवासिय माविबाट एसईईमा सम्मिलित विद्यार्थी मध्ये ३.८५ जिपीए सहित रसुभ श्रेष्ठ जिल्ला तृतीय हुन सफल हुनुभएको छ । परिक्षामा सहभागि मध्ये ५१ जनाले ३ देखी ३.८५ जिपीए र ५ जनाले २.९ देखी २.५५ जिपीए ल्याएर एसईई उत्तीर्ण विद्यार्थी र अभिभावकहरुलाई बधाई तथा सम्मान गरीएको हो ।
चिल्ड्रेन पार्क आवासिय माध्यमिक विद्यालयका प्रिन्सिपल षष्टि कुमार श्रेष्ठको अध्यक्षमा सम्पन्न भएको कार्यक्रममा जिल्ला समन्वय समितिका प्रमुख नवराज अधिकारीको प्रमुख आतिथ्य रहेको थियो ।जिल्ला समन्वय समितिका उप प्रमुख कुलमान विकको विशेष आतिथ्य रहेको कार्यक्रममा क्याम्पस व्यावस्थापन समितिका अध्यक्ष शान्त विक्रम बानिया,व्यावस्थापन समितिका सदस्य विष्णु सिलवाल,विद्यालय संयोजक शशी अर्याल,साईन्स संयोजक ईन्द्रराज श्रेष्ठ,प्रि प्राईमरी ईन्चार्ज अनिता शाक्य लगायतको आतिथ्य रहेको थियो ।
बधाई तथा सम्मान समारोहलाई सम्बोधन गर्नुहुदै प्रमुख अतिथी नवराज अधिकारीले उच्च शिक्षाका लागि अंकका आधारमा भन्दापनि रुची र दक्षताका आधारमा विषय छनोट गर्न सुझाव दिनुभयो । यस विद्यालयले धादिङ जिल्लाको शिक्षा क्षेत्रमा ठुलो योगदान पुर्याएको भन्दै अधिकारीले आगामी दिनमा समन्वय र सहकार्य गरेर जाने बताउनुभयो ।
यसैगरी जिल्ला समन्वय समितिका उप प्रमुख कुलमान विकले चिल्ड्रेन पार्क आवासीय माध्यमिक विद्यालयमा पढेका विद्यार्थीहरुले विश्व बजारमा प्रतिस्पर्धा गर्न सक्ने भएका बताउनुभयो ।यसैगरी कार्यक्रममा क्याम्पस व्यावस्थपन समितिका अध्यक्ष शान्त विक्रम बानियाँले यस बर्षदेखी विद्यार्थीहरुको मागलाई सम्बोधन गर्नको लागि होटल म्यानेजम्यानट विषय अध्यापन गराउन लागिएको बताउनुभयो ।
अभिभावक र विद्यार्थीहरुको मागलाई मध्यनजर गरेर क्याम्पसले होटल म्यानेजम्यान्ट विषय यसबर्षदेखी सुरु गरेको भन्दै उहाँले विश्वस्त भएर भर्ना हुनको लागि आग्रह गर्नुभयो। कार्यक्रममा विद्यालयका प्रिन्सिपल षष्टि कुमार श्रेष्ठले एसईई परिक्षामा उत्तीर्ण भएका विद्यार्थीहरुलाई बधाई दिदै उज्वल शैक्षिक भविष्यको लागि शुभकामना दिनुभयो ।
चिल्ड्रेनपार्क आवासीय माध्यमिक विद्यालयले विद्यार्थीहरुलाई शैक्षिक क्रियाकलाप मात्र नभएर व्यवहारीक,नैतिक,संस्कार तथा जीवन जीउन विभिन्न उपायहरु सिकाएको भन्दै अप्ठेरो पर्दा नआत्तिकन अगाडी बढ्नको लागि विद्यार्थीहरुलाई आग्रह गर्नुभएको छ ।
विद्यालयका मावि ईन्चार्ज दिपक रेग्मीले संचालन गर्नुभएका कार्यक्रममा वि.स. २०७५ सालमा सईई उत्तिर्ण भई हाल एमबिबिएस पढ्नको लागि छात्राबृत्तिमा नाम निकाल्न सफल पुर्व विद्यार्थी विक्रम श्रेष्ठलाई पनि सम्मान गरीएको छ ।
