काठमाडौँ,१५ भाद्र ।
दाङमा चट्याङ लागेर दुई जनाको मृत्यु भएको छ । दाङको घोराही उपमहानगरपालिका -१२ गुरौँ गाउँमा मंगलबार राति चट्याङ लागेर १६ वर्षीया दीपा घर्ती र १९ वर्षीया मोनिसा साहको मृत्यु भएको हो ।
साथै अन्य १० जनाभन्दा बढी घाइते भएका छन्। जसमा दुई जनाको अवस्था गम्भीर रहेको जिल्ला प्रहरी कार्यालय दाङले जनाएको छ । उनीहरुलाई उपचारका लागि राप्ती स्वास्थ्य विज्ञान प्रतिष्ठान लगिएको बताइएको छ ।
गुरौँ गाउँमा तीजको नाचगान गरिरहेको स्थानमा चट्याङ परेर सो घटना घटेको हो । घटनाबारे थप विवरण आउन बाँकी रहेको प्रहरीले जनाएको छ।
