धादिङ,२० बैशाख
नीलकण्ठ नगरपालिका वडा नम्बर १२ को आयोजनामा महिलाहरुको लागि आयोजित एक दिने क्षमता विकास सम्बन्धी तालिम सम्पन्न भएको छ । बालबालिका र जेष्ठ नागरिकको संरक्षणमा महिलाहरुको भुमिका सम्बन्धी क्षमता विकास तालिम मंगलबार सम्पन्न भएको हो ।
वडा नम्बर १२ को वडा अध्यक्ष धर्मराज भण्डारीको अध्यक्षतामा सम्पन्न भएको तालिममा वडा भित्रका १ सय १५जना महिलाहरुको सहभागिता रहेको थियो ।
महिलाहरुको जिम्मेवारी धेरै हुने भएकोले ती जिम्मेवारीलाई सहज रुपमा कसरी बहन गर्ने र आफुभित्र भएको तनावलाई कसरी सामना गर्ने भन्ने विषयमा छलफल भएको थियो । घरका बालबालिका र जेष्ठ नागरिकहरुको स्याहारमा महिलाको ठुलो भुमिका हुने भएकाले उनीहरुको भावनालाई कसरी सम्बोधन गर्ने र जेष्ठ नागरिकहरु र बालबालिकाहरुमा देखिने मनोसामाजिक समस्यालाई कम गर्नको लागि के कस्ता व्यवहारहरु गर्ने भन्ने विषयमा मनोविमर्शकर्ता रामकुमार थापाले सहजीकरण गर्नुभएको थियो ।
जिम्मेवारी बहन गर्ने क्रममा महिलाहरुले आफ्नो स्वास्थ्यमा खासै ध्यान दिन नसकेको अवस्थामा प्रशिक्षक थापाले स्वहेरचाह कसरी गर्न सकिन्छ भन्ने विषयमा समेत सहजिकरण गर्नुभएको थियो । भिडियो र पावरप्वाईन्ट मार्फत प्रशिक्षक थापाले सहजिकरण गर्नुभएको वडा नम्बर १२ का वडा सचिव उर्मीला थपलियाले जानकारी दिनुभयो ।
तालिम समापन समारोहलाई सम्बोधन गर्नुहुदै वडा अध्यक्ष धर्मराज भण्डारीले महिला,बालबालिका र जेष्ठ नागरिकहरुको क्षेत्रमा वडाले विभिन्न कार्यक्रम सन्चालन गरीरहेको भन्दै उहाँले वडा सधै नागरिकहरुको पक्षमा रहेको बताउनुभयो ।वडाको विकासको लागि के गर्न सकिन्छ भनेर आफुले नगरपालिका,प्रदेश र संघ सम्म पुगेर योजना माग्ने काम गरेको भन्दै भण्डारीले आफ्नो कार्यकाललाई सफल बनाउनको लागि वडाको विकासको लागि काम गरीरहेको बताउनुभयो । वडा सचिव उर्मिला थपलियाले सन्चालन गर्नुभएको कार्यक्रममा स्वागत मन्तव्य वडा सदस्य सानुमैयाँ राउतले राख्नुभएको थियो ।
