धादिङ,१९ जेठ ।
धादिङ उद्योग बाणिज्य संघको नव निर्वाचित टीमलाई पद हस्तान्तरण गरिएको छ ।
संघको अधिवेशनबाट निर्वाचित अध्यक्ष तथा पदाधिकारीलाई बुधबार एक कार्यक्रमका बीच पद हस्तान्तरण गरिएको हो । संघका नव निर्वाचित अध्यक्ष बिष्णु प्रसाद थपलियालाई निवर्तमान अध्यक्ष रुद्रबहादुर खत्रीले निर्णय पुस्तिका हस्तान्तरण गर्दै पद सुम्पिनुभएको हो ।
नेपाल उद्योग वाणिज्य महासंघका जिल्ला÷नगर उपाध्यक्ष दिनेश श्रेष्ठको प्रमुख आतिथ्यता रहेको कार्यक्रममा नेपाल उद्योग वाणिज्य महासंघका वस्तुगत उपाध्यक्ष अन्जन श्रेष्ठ,धाङिका प्रमुख जिल्ला अधिकारी कृष्ण प्रसाद लम्साल को विशेष आतिथ्यता रहेको थियो ।
कार्यक्रममा उद्योग वाणिज्य महासंघका जिल्ला÷नगर उपाध्यक्ष श्रेष्ठले जिल्लाको व्यवसायीहरुको हकहितको लागि उद्योग वाणिज्य संघले सदैव काम गर्ने भन्दै नवनिर्वाचित सदस्यहरुलाई नयाँ र ब्यवसायी मैत्री कार्ययोजना बनाई काममा लाग्न आग्रह गर्नुभएको छ ।
२०७८ चैत १० गतेदेखि १४ गतेसम्म चलेको अधिवेशनले नयाँ कार्यसमिति चयन गरेको भएपनि उनीहरुले पद बहाल गरेका थिएनन् । पद हस्तान्तरण संगै बसेको जिल्ला समितिको पुर्ण वैठकले कार्यसमितिका पदाधिकारीहरु चयन गरेको छ । जसमासंघको महासचिवमा तिलक सिंखडा चयन भएका छन् ।
त्यस्तै कार्यसमितिको उद्योग उपाध्यक्षमा राजाराम सिलवाल, बाणिज्य उपाध्यक्षमा शेषकान्त कँडेल, महिला उपाध्यक्षमा अम्विका अधिकारी र बस्तुगत उपाध्यक्षमा गोविन्द भण्डारी चयन भएका छन् । त्यस्तै सचिवमा नृपेश न्यौपाने, अजय त्रिपाठी र अर्जुन सापकोटा चयन भएका छन् भने कोषाध्यक्षमा सुमन धरेल चयन भएका छन् ।
संघको विधान अनुसार सवै सदस्यहरु निर्वाचित गरेपछि निर्वाचित सदस्यहरुबाट पदाधिकारी चयन गर्ने ब्यवस्था छ । कार्यसमितिको वैठकले रोहित भण्डारी, शान्त विक्रम बानियाँ, रामजी अधिकारी, सुदर्शन रिजाल र किरण पाठकलाइ जिल्ला समितिको सदस्यमा मनोनित पनि गरेको छ । नयाँ कार्यसमितिले सदस्यहरु मनोनित गरेसंगै कार्यसमितिको संख्या ३३ पुगेको छ ।
