धादिङ, ०३असार ।
धादिङको चिल्ड्रेन पार्क आवासीय माध्यमिक विद्यालयमा जिल्लामै पहिलो पटक विद्यालय मनोपरामर्श कार्यक्रम सुरु भएको छ।विद्यालयको शैक्षिक गुणस्तरमा सुधार ल्याउन र अभिभावक र विद्यार्थीहरुलाई सकारात्मक सोच अभिवृद्धी गर्ने उदेश्यले कार्यक्रम सुरु गरिएको प्रिन्सिपल षष्टी कुमार श्रेष्ठले जानकारी दिनुभयो।
विद्यार्थीहरुको भविष्य र पढाई प्रति विद्यालय बढीनै संवेदनशिल रहेको भन्दै त्रिपक्षीय सहकार्य स्थापित गरी शैक्षिक गुणस्तर बृद्धि गर्ने र बालबालिकाहरुलाई व्यवहारिक र नैतिकवान बनाउने लक्ष्य रहेको श्रेष्ठले बतानुभयो ।
कक्षा ६ देखी १० सम्म अध्ययन गर्ने विद्यार्थी र अभिभावकहरुलाई परामर्श कार्यक्रम सन्चालन गरिने छ।तनाव,पिर र चिन्ताको कारणले बालबालिकाहरुलाई समस्या हुने भन्दै ति समस्या पहिचान गरि समस्या समाधानको लागि विद्यालयले मनोपरामर्शकर्ता मार्फत परामर्श गर्ने विद्यालयको लक्ष्य रहेको छ। विद्यार्थीहरुलाई मात्रै परामर्श गरेर नहुने भन्दै विद्यार्थीहरुको व्यवहारीक समस्या समाधानको लागि अभिभावकको महत्वपुर्ण भुमिका हुने भन्दै अभिभावकलाई पनि परामर्श गरीएको शिक्षक दिपक रेग्मीले जानकारी दिनुभयो।
मनोसामाजिक परामर्शकर्ता रामकुमार थापाले अभिभावको कारणले बालबालिकामा हुने तनाव,बालबालिकाहरुमा देखिने व्यवहारिक समस्या तथा मनोसामाजिक समस्याहरुको बारेमा जानकारी गराउनु भएको थियो।बालबालिकामा हुने तनाव र चिन्ताको कारणले देखिने लक्षणहरुको बारेमा समेत जानकारी गराउनु भएको थियो ।
अनुशासित र राम्रो बनाउने बहानामा अभिभावकहरुले गरेको नकारात्मक व्यवहारले बालबालिकाहरुको मनमा चोट पुगीरहेको भन्दै नराम्रो व्यवहारहरुलाई छोडेर सकारात्मक र असल व्यवहार गर्नको लागि आग्रह गर्नुभएको थियो।परामर्श पछि अभिभावकहरु उत्साहित हुनुभएको छ । प्रत्यकेक ३/३ महिनामा यस्तो कार्यक्रम राख्नको लागि समेत सुझाव दिनुभयो ।अहिले सम्म आफुहरुले गलत व्यावहार गरीरहेको भन्दै अहिले आफुलाई बालबालिकाहरुलाई गरेको व्यवहार प्रति पछुतो लागेको बताउनुभएको थियो।
आजैदेखी आफ्नो बालबालिकाहरुलाई राम्रो व्यवहार गर्ने,छोराछोरीसँग नरिसाउने,नझर्किने,बालबालिका पढीरहेको समयमा मोबाईल नहेर्ने, उनीहरुसँगै बसेर गृहकार्यमा सहजिकरण गर्ने,दिनमा एक वटा असल कुरा सिकाउने अभिभावकहरुले प्रतिबद्धता जनाउनु भएको छ ।कार्यक्रममा मनोपरामर्शकर्ता रामकुमार थापाले बालबालिकाहरुसँग कसरी कुरा गर्ने,उनीहरुको भावना कसरी अभिव्यक्त गराउने,असल कसरी बनाउने लगायत १५ वटा सिपहरु सिकाउनु भएको थियो ।
