धादिङ,२७ भाद्र।
खनियाबास गाउपालिकाले गाउपालिकाका जनप्रतिनिधिहरु र कर्मचारीहरुलाई क्षमता बृद्धि तालिम दिएको छ । आज धादिङबेशी स्थित आर.के होटलमा एक कार्यक्रम बिच उक्त तालिमको उद्घाटन गरिएको हो ।
गाउपालिकाका अध्यक्ष रण बहादुर तामाङको अध्यक्षतामा भएको कार्यक्रममा प्रमुख जिल्ला अधिकारी कृष्ण प्रसाद लम्सालको प्रमुख आतिथ्यता तथा कोलेनिका धादिङका प्रमुख कोष नियन्त्रक पुरुषोत्तम शर्माको बिशेष आतिथ्यता रहेको थियो ।
भोली सम्म संचालन हुने उक्त तालिममा प्रमुख जिल्ला अधिकारी कृष्ण प्रसाद लम्सालले स्थानिय सरकार र सुशासन सम्बन्धी अभिमुखिकरण गर्नु भएको थियो । कार्यक्रममा प्रमुख कोष नियन्त्रक पुरुषोत्तम शर्माले सहभागी जनप्रतिनिधि तथा कर्मचारीहरुलाई आर्थिक ब्यवस्थापन सम्बन्धी अभिमुखिकरण गर्नु भएको हो ।
त्यसै गरी कार्यक्रममा सह प्राध्यापक मिलन श्रेष्ठले स्थानिय सरकार संचालन सम्बन्धि सेसन संचालन गर्नु भएको थियो । गाउपालिका बाट प्रवाह गरिने सेवालाई चुस्त दुरुस्त बनाई सेवामा थप प्रभावकारी बनाउन सहयोग पुगोस भनेर यस किसिमको तालिमको आयोजना गरिएको गाउपालिकाका प्रमुख प्रशासकिय अधिकृत बालकृष्ण नेपालीले बताएका छन ।
