नेपाल टेलिकमले ई–सिम अर्थात इम्बेडेड सिमकार्ड उपलब्ध गराउने तयारी सुरू गरेको छ। यसका लागि टेलिकमले बेलायतको मोन्टी युके ग्लोबलसँग सम्झौता पनि गरिसकेको जनाएको छ । सम्झौता अनुसार मोन्टी युके ग्लोबलले टेलिकमका ग्राहकहरुलाई इ–सिम सेवा प्रदानका लागि आवश्यक प्रविधि उपलब्ध गराउने छ ।
पछिल्लो समय मोबाइल निर्माता कम्पनीहरुले हाते मोबाइल सेटमा भौतिक सिमकार्ड हटाउन थालेका छन् । केही दिन अघिमात्रै अमेरिकी टेक कम्पनी एप्पलले सार्वजनिक गरेको आईफोन १४ सिरिजबाट सिमकार्ड ट्रे नै हटाइएको छ ।
तर नेपालमा हालसम्म दूरसञ्चार सेवा प्रदान गरिरहेका नेपाल टेलिकम, एनसेल र स्मार्ट टेलिकमले ई–सिम सेवा शुरु गरिसकेका छैनन् । ई सिम बिग्रने खतरा पनि नहुने र सुरक्षाका दृष्टिले पनि इ–सिम उपयुक्त हुने टेलिकम कम्पनीहरुको दाबी रहेको छ । इ–सिम प्रयोगमा आएपछि सिमकार्ड परिवर्तन गर्नुपर्ने आवश्यकता हुँदैन।
