नेकपा एमालेको कुनै गुटमा नलागी पार्टी एकता दबाब अभियान सञ्चालन गर्दै आएका उपाध्यक्ष वामदेव गौतमले आफू एमाले बैठकमा आएको र अब नफर्किने बताएका छन् ।
उनले पार्टी एकताको जिम्मा दिएमा दुवै नेतालाई मिलाउने दाबी समेत गरेका छन् । प्रधानमन्त्री निवास बालुवाटारमा बसेको एमाले केन्द्रीय कमिटी बैठकलाई शुक्रवार सम्बोधन गर्दै उपाध्यक्ष गौतमले पार्टी एकताको जिम्मा आफूलाई दिन प्रस्ताव गरेका हुन् ।
‘पार्टी एकताको जिम्मा मलाई दिनुस्, तपाईं र माधव नेपाललाई समेत मान्य हुनेगरी पार्टी एकता गर्छु, पार्टीलाई फेरि पुरानै अवस्थामै फर्काउँछु,’ गौतमले भने, ‘आजको भोलि नै त भन्दिनँ, केही दिनमा दुवैलाई मिल्नेगरी पार्टी एकता गर्छु ।’
प्रधानमन्त्री एवं अध्यक्ष ओलीको एक प्रश्नको जवाफमा गौतमले आफू फेरि नफर्किने बताए ।
‘म बैठकमा आएको छु, पार्टी एकता जोगाउन लाग्छु, कतै फर्किँदिनँ,’ गौतमले भने ।
उनले प्रचण्डलाई ल्याउन नसकेपनि माधव नेपाललाई पार्टीमा ल्याएर चुनावको वातावरण बनाउनु पर्ने बताए ।
