धादिङमा आज २ सय २० जनाले मतदाता नामावलीमा नाम दर्ता गराएका छन्।शुक्रबारदेखी जिल्लामा पहिलो चरण अन्तरगत छ वटा स्थानिय तहमा आजबाट मतदाता नामावली संकलन सुरु भएको छ।पहिलो चरणमा आजदेखी रुवीभ्याली, गंगाजमुना, सिद्धलेक, गजुरी, ज्वालामुखी गाउपालिका र धुनीबेशी नगरपालिका सुरु भएको छ।
शनिबार गंगाजमुना गाउपालिकामा २६ जना, गजुरीमा ६२, ज्वालामुखीमा ४०, धुनिवेशी नगरपालिकामा ६७, रुवीभ्याली गाउपालिकामा ९ र सिद्धलेक गाउपालिकामा १६ गरि २ सय २० जनाले मतदाता नामावलीमा नाम दर्ता गराएका जिल्ला निर्वाचन कार्यालय धादिङका जिल्ला निर्वाचन अधिकारी सन्तोष कुमार श्रेष्ठले जानकारी दिनुभयो ।शुक्रबार मात्रै १ सय ४७ जनाले दर्ता गराएका थिए।पहिलो चरणको कार्यक्रम २६ गतेसम्म संचालन हुने छ।
यस्तै दोस्रो चरणमा मंसिर २८ गतेदेखि पुष ८ गतेसम्म त्रिपुरासुन्दरी, नेत्रावती डबजोङ, बेनिघाट रोराङ, थाक्रे, गल्छी, खनियाबास गाउपालिकामा संचालन हुने छ।अहिलेसम्म छुटेका, नयाँ दर्ता गराउन र आ–आफ्नै स्थानीय तहको कार्यालयबाट मतदाता नामावली संकलन गर्ने भएकोले नेपाली नागरिकता प्राप्त गरेका नागरिकले समयमै दर्ता गराउन निर्वाचन अधिकारी श्रेष्ठले बताउनुभयो ।
यस्तै दर्ता गर्न छुट भएकाहरुले अनिर्वाय रुपमा सक्कल नेपाली नागरिकता सहित जिल्ला निर्वाचन कार्यालय र जिल्ला प्रशासन कार्यालय धादिङबाट समेत दर्ता गराउन सकिने उहाँले बताउनुभयो।निलकण्ठ नगरपालिकाको भने हरेक दिन जिल्ला निर्वाचन कार्यालय र जिल्ला प्रशासन कार्यालयबाट दर्ता भइरहेको छ।
१८ वर्ष उमेर पूरा भएका नेपाली नागरिकको नाम मतदाता नामावलीमा समावेश गरिनेछ।मतदाता नामावलीमा नाम समावेश गर्न छुट भएका आम नागरिक तथा विभिन्न सरोकारवालाहरूलाई स्थानीय स्तरमै पुगी मतदाता नामावली दर्ता गराउन निर्वाचन आयोगले सबै समक्ष अनुरोध गरेको छ।
