नेत्रावती डबजोङ गाउपालिका–४,सेल्लेमा जारी फुटबल प्रतियोगितामा ब्रादी युवा क्लब,चरङ्गे युवा क्लब र डि.एफ.सि. सेमिफाईनल प्रवेश गरेका छन् ।“दोस्रो प्रदिप स्मृति कप खुल्ला सेभेन ए साईड प्रतियोगिता अन्तरगत आज सम्पन्न पहिलो खेलमा ब्रादी युवा क्लबले डुप्चे युवा क्लबलाई ४–० गोलले पराजित गर्याे ।त्यस्तै दोस्रो खेलमा डि.एफ.सि. धादिङ्ग र चरङ्गे युवा क्लब ’ए’ बिचको खेलमा १–१ गोलको बराबरी भएपछि पेनाल्टीमा डि.एफ.सि. ४–२ गोलले बिजयी भएको हो ।आजै सम्पन्न अन्तिम खेलमा नागिनथान युथ क्लब चरङ्गे युवा क्लब ‘बि’ संग ७–३ गोलले पराजित भयो।
प्रतियोगितामा भोली सेमिफाईनलका २ खेलहरु हुनेछन् ।पहिलो समिफाईनल खेलमा आयोजक छोईलिङ्ग युथ क्लब र डि.एफ.सि. धादिङ् भिड्नेछन् भने दोस्रो सेमिफाईनलमा ब्रादी युवा क्लब र चरङ्गे युवा क्लब भिड्नेछन् ।छोइलिङ युवा क्लवको आयोजनामा सुरु भएको प्रतियोगितामा जिल्लाका १९ टिमको सहभागिता रहेको थियो।
प्रतियोगिताको बिजेताले नगद रु पचास हजार, ट्रफि, मेडल र प्रमाणपत्र, उपबिजेताले नगद रु तिस हजार,ट्रफी, मेडल र प्रमाणपत्र, सेमिफाइनलिस्ट २ टिमले नगद रु आठ हजार प्राप्त गर्ने आयोजकले जनाएको छ ।साथै प्रतियोगिताको उत्कृष्ट खेलाडी, उत्कृष्ट गोलरक्षक र उच्च गोलकर्तालाई ट्रफी, मेडल र प्रमाणपत्र, हरेक खेलमा म्यान अफ दि म्याचलाई समेत विशेष पुरस्कारको व्यवस्था गरिएको आयोजकले जानकारी दिएको छ ।प्रतियोगिताको फाईनल, समापन तथा पुरस्कार वितरण पौष ४ गते हुने आयोजकले जनाएको छ ।
