धादिङ । गजुरी गाउँपालिका वडा नं १ मा रहेको चेपाङ किशोरी छात्रावासका बालिकाहरुको लागि न्यानो कपडा प्रदान गरिएको छ । चेपाङ किशोरी छात्रावासमा बसि अध्ययन गर्ने ३२ जना बालिकाहरुको लागि ज्याकेट,हाइनेक सेट, ट्राउजर ,स्कुल सुईटर,जुत्ता ,मोजा सहितको सामग्री सहयोग गरिएको हो ।
गजुरी गाउँ पालिका अध्यक्ष गणेशलाल श्रेष्ठ, वडा नं १ का वडाध्यक्ष तारा भण्डारी ,निबर्तमान उपाध्यक्ष सीता ढुङ्गाना ,समाजसेवी शिवनिधि खनाल,प्रयास नेपाल धादिङका कार्यकारी निर्देशक दामोदर अर्याल लगायतले बालिकाहरुलाई सामाग्री हस्तान्तरण गर्नु भएको थियो । चेपाङ किशोरी छात्रावास गजुरी हागेटारमा जिल्लाका गजुरी सहित बेनिघाटरोराङका बाबा,आमा गुमाएका,दुर्गम भौगोलिक स्थान बसोबास गर्ने ,बिद्यालय टाढा भई माध्यमिक शिक्षा लिनबाट बञ्चित ,अति बिपन्न सिमान्तकृत चेपाङ समुदायका बालिकाहरु मात्रै बसेर पढ्न मिल्ने नियम बनाएर गजुरी गाउँपालिकाले संचालन गर्दै आएको छ ।
चेपाङ किशोरी छात्रावासमा ३६ जना बालिकाहरुको आवासीय रुपमा बस्ने कोठा ,पुस्तकालय कक्ष,भान्सा सहित व्यवस्थान गर्ने कार्य स्थानीय गैरसरकारी संस्था प्रयास नेपालले गरिएको छ । दैनिक खानपिन र अन्य नियमित रुपमा गर्नु पर्ने रेखदेख तथा व्यवस्था गाउँपालिकाबाट गरिएको गजुरी गाउँपालिका अध्यक्ष गणेशलाल श्रेष्ठले बताउनु भयो ।
दैनिक खानपिन व्यवस्थापन र रेखदेखमा सहयोग गर्न गजुरी गाउँपालिकाको तर्फबाट १ जना चेपाङ समुदायको नै बिवाहित महिलालाई होस्टल वार्डेन रुपमा व्यवस्थापन गरिएको गजुरी गाउँपालिका वडा नं १ का वडाध्यक्ष तारा भण्डारीले बताउनु भयो । यसैगरी छात्रावासमा रहेका किशोरीहरुको जिवनउपयोगी सीप विकास तथा नेतृत्व विकास गर्ने र सिकाई उपलब्ध बृद्धि गराउन अतिरिक्त कक्षा संचालन गर्ने जस्ता कार्यहरू नियमित रुपमा गरिरहेको पनि वडाध्यक्ष तारा भण्डारीले बताउनु भयो ।
मंगलबार गाउँपालिका अध्यक्ष गणेशलाल श्रेष्ठको नेतृत्वमा प्लानेट ईन्फान्ट एण्ड डेभलपमेन्ट र प्रयास नेपाल धादिङको तर्फबाट प्रति बालिका ३५ सय बराबरको न्यानो कपडा सहयोग गरिएको प्रयास नेपाल धादिङका सहजकर्ता सबिना चेपाङले जानकारी दिनु भयो ।
