धादिङको सिद्धलेक गाउँपालिकामा माध्यमिक तहको अन्तर विद्यालय हाजिरी जवाफ प्रतियोगिता सम्पन्न भएको छ । गाउँपालिकाको शिक्षा युवा तथा खेलकुद शाखाको आयोजनामा वडा नं ७ स्थित सत्यवती माध्यमिक विद्यालय आदमटारमा सम्पन्न भएको प्रतियोगितामा १२ ओटा माध्यमिक विद्यालयको सहभागिता रहेको थियो ।
प्रतियोगितामा वडा नम्बर १ मा रहेको मिन्दुका मावि प्रथम, वडा नम्बर ७ को सत्यवती मावि द्धितिय, वडा नम्बर ७ कै महाकाली मावि तृतिय र वडा नं २ को नलाङ पात्ले मावि सान्त्वना भएको गाउँपालिकाका शैक्षिक सहजकर्ता बलराम अधिकारीले जानकारी दिनुभयो ।
प्रतियोगितामा प्रथम, द्धितीय, तृतीय र सान्त्वना हुने विद्यालका विद्यार्थीहरुलाई क्रमश १० हजार ५ सय, ७ हजार ५ सय, ४ हजार ५ सय र ३ हजार नगद सहित शिल्ड, मेडल र प्रमाणपत्रबाट पुरस्कृत गरीएको अधिकारीले बताउनुभयो। गाउँपालिकाका प्रमुख प्रशासकिय अधिकृत नन्दलाल शर्माको अध्यक्षतामा सम्पन्न भएको प्रतियोगितामा गाउँपालिकाका अध्यक्ष प्रेमनाथ सिलवालको प्रमुख आतिथ्य तथा वडा नं ७ का वडाध्यक्ष लक्ष्मण खतिवडाको विशेष आतिथ्यता रहेको थियो।
यसैगरी सोमबार आधारभुत तहको अन्तर विद्यालय हाजिरी जवाफ प्रतियोगिता सम्पन्न भएको छ । १५ ओटा विद्यालयको सहभागिता रहेको प्रतियोगितामा वडा नम्बर ४ को जलेश्वरी मावि प्रथम, वडा नम्बर ३ को अमर आदर्श मावि द्धितिय, वडा नम्बर ७ को महाकाली मावि तृतिय र सत्यवती मावि सान्त्वना भएका छन् ।
प्रतियोगितामा प्रथम, द्धितीय, तृतीय र सान्त्वना भएका विद्यालका विद्यार्थीहरुलाई क्रमश ७ हजार ५ सय, ५ हजार १ सय, ३ हजार, २ हजार ४ सय नगद सहित मेडल, शिल्ड र प्रमाणपत्रबाट पुरस्कृत गरीएको सहजकर्ता बलराम अधिकारीले जानकारी दिनुभयो ।
सिद्धलेक गाउँपालिकाका शिक्षा अधिकृत प्रविन बाबु भट्टराईको अध्यक्षतामा सम्पन्न भएको प्रतियोगितामा सिद्धलेक गाउँपालिकाका उपाध्यक्ष कमला शर्माको प्रमुख आतिथ्य र वडा नं ७ का वडाध्यक्ष लक्ष्मण खतिवडाको विशेष आतिथ्यतामा कार्यक्रम सम्पन्न गरीएको अधिकारीले बताउनुभयो।
