धादिङ,०५ जेठ
नीलकण्ठ बहुमुखी क्याम्पसमा महिनावारी स्वच्छता व्यवस्थापन तथा वैकल्पिक सेनिटरी प्याड बनाउने तालिम संचालन भएको छ । युवा रेडक्रस सर्कल नीलकण्ठ बहुमुखी क्याम्पसको आयोजना तथा त्रिचन्द्र क्याम्पसको सहयोगमा आजदेखि २ दिने तालिम संचालन भएको हो ।
बजारमा किन्ने सेनिटरी प्याड बढि खर्चिलो हुनुका साथै गुणस्तर पनि कम हुने भएकोले महिनावारी सम्बन्धि थप जनचेतना फैलाउन र घरेलु प्याडको प्रयोगबारे जानकारी दिने उद्धेश्यले तालिमको आयोजना गरिएको हो ।
नीलकण्ठ बहुमुखी क्याम्पसका प्रमुख नमराज शार्माले तालिममा सिकेका कुरालाई व्यावहारमा लागु गर्नु पर्ने र आफुले सिकेको सिपलाई अरुलाई पनि सिकाउनु पर्ने बताउनु भयो ।
त्यसैगरी नीलकण्ठ बहुमुखी क्याम्पसमा अध्ययन गर्ने विद्यार्थीहरुले यस्ता थुप्रै सामाजिक कार्यमा लागेको बताउनुभयो । उहाँले आगामी दिनमा पनि यस्ता सामाजिक कार्य गर्नको लागि आग्रह गर्नु भएको छ । तालिममा ४२ जना विद्यार्थीहरुको सहभागिता रहेको थियो ।
युवा रेडक्रस सर्कल नीलकण्ठ बहुमुखी क्याम्पसका अध्यक्ष कुमार श्रेष्ठको अध्यक्षतामा संचालन भएको तालिममा नेपाल रेडक्रस सोसाइटि जिल्ला शाखा धादिङका सभापति दुर्लभ कुमार तामाङको प्रमुख अतिथ्य रहेको थियो भने नीलकण्ठ बहुमुखी क्याम्पसका क्याम्पस प्रमुख नमराज शार्माको विषेश आतिथ्य रहेको थियो । तालिममा क्याम्पसका शिक्षक शिक्षिका, विद्यार्थीहरु लगायतको उपस्थिति रहेको थियो ।
