धादिङ।
नुवाकोटको त्रिशुली अस्पतालमा कोरोनाको ‘डेल्टा प्लस’ भेरिएन्ट भेटिएको त्रिशुली अस्पतालले जानकारी दिएको छ। शुक्रबार अस्पतालले एक पे्रस बिज्ञप्ती जारी गर्दै त्रिशुली अस्पताल पीसीआर प्रयोगशालामा पोजेटिभ देखिएका ४ वटा स्वाबका नमुनाहरु राष्ट्रिय प्रयोगशाला काठमाडौं मार्फत अन्तराष्ट्रिय प्रयोगशालामा gene sequencine गर्न पठाईएकोमा ३ वटा स्वाबका नमुनाहरु ‘डेल्टा’ (B.617.2) र बाँकी १ वटामा ‘डेल्टा प्लस’(B.167.2)+ K417N पुष्टि भएको जनाएको छ ।
यसअघि नेपालमा भेटिएका अल्फा भेरिएन्ट र डेल्टा भेरिएन्ट भन्दा ‘डेल्टा प्लस’ भेरिएन्ट ६० देखि १०० प्रतिशत भन्दा बढी संक्रामक हुने बिभिन्न अनुसन्धानले पुष्टि गरेको पे्रस बिज्ञप्तीमा उल्लेख गरिएको छ ।
यो भेरिएन्ट भारतमा समेत पाइएको छ । यसमा कोरोना भाइरसको पुरानो भेरिएन्टमा अलि परिवर्तन भएको र डेल्टा भेरिएन्ट नै विकसित भएर डेल्टा प्लस भेरिएन्ट बनेको बिज्ञहरुले बताएका छन् । यो भेरिएन्ट बढी संक्रामक तथा सबै उमेर समूहका व्यक्तिलाई असर पार्ने विभिन्न अध्ययनबाट देखिएको छ।
